• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ສອງ ກະຊວງ ພະລັງງານ ແລະ ບໍ່ແຮ່ ສປປລາວ ແລະ ກະຊວງ ອຸດສາຫະກຳ ແລະ ການຄ້າ ສສ ຫວຽດນາມ ພົບປະ, ປຶກສາຫາລືກັນ

ເພື່ອຈັດຕັ້ງຜັນຂະຫຍາຍສັນຍາຮ່ວມມື ລະຫວ່າງ ສອງ ລັດຖະບານ, ໂດຍສະເພາະແມ່ນສັນຍາວ່າດ້ວຍການຮ່ວມມືດ້ານພະລັງງານ ແລະ ບໍ່ແຮ່ ທີ່ລົງນາມໃນວັນທີ 5 ກຸມພາ 2018 ທີ່ຜ່ານມາ ຢູ່ນະຄອນຫຼວງວຽງຈັນ. ລະຫວ່າງວັນທີ 2-5 ເມສາ 2018 ຢູ່ນະຄອນຫຼວງ ຮ່າໂນ້ຍ, ສສ ຫວຽດນາມ ໄດ້ມີກອງປະຊຸມພົບປະ, ປຶກສາຫາລື ລະຫວ່າງ ກະຊວງ ພະລັງງານ ແລະ ບໍ່ແຮ່ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງ ອຸດສາຫະກຳ ແລະ ການຄ້າ ແຫ່ງ ສາທາລະນະລັດ ສັງຄົມນິຍົມ ຫວຽດນາມ. ຝ່າຍ ລາວ ນຳໂດຍ ທ່ານ ປອ ຄຳມະນີ ອິນທິລາດ ກຳມະການສູນກາງພັກ ປະຊາຊົນ ປະຕິວັດລາວ, ລັດຖະມົນຕີກະຊວງ ພະລັງງານ ແລະ ບໍ່ແຮ່ ພ້ອມດ້ວຍຄະນະ ແລະ ຝ່າຍ ຫວຽດນາມ ນຳໂດຍ ທ່ານ ເຈິນ ດ໋ວນ ແອ້ງ ກຳມະການສູນກາງພັກ ຄອມມູນນິດຫວຽດນາມ, ລັດຖະມົນຕີ ກະຊວງ ອຸດສາຫະກຳ ແລະ ການຄ້າ ສສ ຫວຽດນາມ.

ການພົບປະກັນ ລະຫວ່າງ ການນຳຂອງທັງສອງກະຊວງຄັ້ງນີ້ ໄດ້ເປັນຂີດໝາຍສຳຄັນ ແຫ່ງການພົວພັນຮ່ວມມືແບບພິເສດ ແລະ ຮອບດ້ານ ລະຫວ່າງ ສອງພັກ-ສອງລັດ ເວົ້າລວມ, ເວົ້າສະເພາະ ລະຫວ່າງ ສອງກະຊວງ ເຊິ່ງເປັນການພົບປະກັນຄັ້ງທຳອິດໃນປີ 2018. ນອກຈາກການແລກປ່ຽນຄວາມຄິດ ຄວາມເຫັນ ໃນການຈັດຕັ້ງປະຕິບັດ 7 ສັນຍາການຮ່ວມມືລະຫວ່າງ ສອງ ລັດຖະບານ ທີ່ລົງນາມຢູ່ ນະຄອນຫຼວງວຽງຈັນ ເມື່ອຕົ້ນປີເຊິ່ງລວມມີ: ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ດ້ານພະລັງງານ ແລະ ບໍ່ແຮ່ ປະຈຳປີ 2018; ຂໍ້ຕົກລົງ ວ່າດ້ວຍການຈັດຕັ້ງຜັນຂະຫຍາຍ ໂຄງການສໍາຫລວດແຮ່ທາດ ແລະ ສ້າງແຜນທີ່ທໍລະນີສາດມາດຕາສ່ວນ 1/200.000 ເຂດແຂວງ ບໍລິຄໍໄຊ-ແຂວງ ໄຊສົມບູນ; ບົດບັນທຶກຄວາມເຂົ້າໃຈ ວ່າດ້ວຍການຊື້-ຂາຍພະລັງງານໄຟຟ້າ ຈາກໂຮງງານພະລັງງານຄວາມຮ້ອນ ບົວລະພາ, ແຂວງຄໍາມ່ວນ (ສປປລາວ) ລະຫວ່າງ ບໍລິສັດ ລ້ານຊ້າງອະສັງຫາລິມະຊັບ ແລະ ພັດທະນາພະລັງງານ ກັບ ສະຫະບໍລິສັດໄຟຟ້າ ຫວຽດນາມ (EVN); ບົດບັນທຶກຄວາມເຂົ້າໃຈ ວ່າດ້ວຍການຊື້-ຂາຍພະລັງງານໄຟຟ້າ ຈາກເຂື່ອນໄຟຟ້າເຊກອງ 3A, 3B ຢູ່ແຂວງເຊກອງ; ເຂື່ອນໄຟຟ້ານໍ້າຊໍາ 1A, 1B, ນໍ້າຊໍາ 3, 3A ຢູ່ແຂວງ ຫົວພັນ; ເຂື່ອນໄຟຟ້ານໍ້າໂມ້ 2 ຢູ່ແຂວງ ຊຽງຂວາງ ຂອງລາວ ລະຫວ່າງ ລັດວິສາຫະກິດໄຟຟ້າຫວຽດນາມ (EVN) ກັບ ບໍລິສັດພົງຊັບທະວີ ກໍ່ສ້າງຂົວທາງ ຈຳກັດ; ບົດບັນທຶກຄວາມເຂົ້າໃຈ ກ່ຽວກັບການຮ່ວມມື-ລົງທຶນ ໂຄງການກໍ່ສ້າງສາຍສົ່ງໄຟຟ້າແຮງສູງ 500 KV, ຈໍານວນ 5.000 MW ຈາກພາກເໜືອລາວ ຫາພາກ ໃຕ້ຫວຽດນາມ ລະຫວ່າງ ລັດວິສາຫະກິດໄຟຟ້າລາວ, ລັດວິສາຫະກິດໄຟຟ້າ ຫວຽດນາມ, ບໍລິສັດພົງຊັບທະວີກໍ່ສ້າງຂົວ-ທາງ ຈຳກັດ ແລະ ບໍລິສັດຮຸ້ນສ່ວນພັດທະນາໄຟຟ້າ ແລະ ພື້ນຖານໂຄງລ່າງຮ່າໂນ້ຍ-ວຽງຈັນ; ບົດບັນທຶກຄວາມເຂົ້າໃຈ ລະຫວ່າງ ບໍລິສັດ Petro Viet Nam Power Corporation (PVP) ແລະ ບໍລິສັດ PT Sole ຈໍາກັດຜູ້ດຽວ ຂອງລາວ ກ່ຽວກັບການຮ່ວມມື ພັດທະນາໂຄງການເຂື່ອນໄຟຟ້ານໍ້າຂອງ ຈຸດຫຼວງພະບາງ  ແລະ ຂໍ້ຕົກລົງ ວ່າດ້ວຍການຮ່ວມມື-ລົງທຶນ ພັດທະນາບັນດາ ເຂື່ອນໄຟຟ້ານໍ້າກົງ 2, ນໍ້າກົງ 3, ນໍ້າອີ່ມູນ ແລະນໍ້າ ແລ້ວ, ທັງສອງຝ່າຍ ຍັງໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄ່າສູງ ຕໍ່ສາຍພົວພັນຮ່ວມມືແບບພິເສດຂອງສອງປະເທດ ທີ່ບໍ່ເຄີຍມີໃນປະຫວັດສາດຂອງໂລກ.

ໃນໂອກາດເຂົ້າຮ່ວມກອງປະຊຸມພົບປະກັບ ກະຊວງ ອຸດສາຫະກຳ ແລະ ການຄ້າ ສສ ຫວຽດນາມ ຄັ້ງນີ້, ທ່ານ ລັດຖະມົນຕີ ພ້ອມຄະນະ ຍັງໄດ້ເຂົ້າຢ້ຽມຂໍ່ານັບ ທ່ານ ຫວຽນ ຊວນຟຸກ ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ຕື່ມອີກ.

X