• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ລັດຖະບານ ຍ້ອງຍໍຜູ້ທີ່ມີຜົນງານດີເດັ່ນ ໃນການກໍ່ສ້າງໂຄງການເຂື່ອນໄຟຟ້າ ເທີນ-ຫີນບູນ ພາກຂະຫຍາຍ

ຕອນເຊົ້າວັນທີ 8 ພະຈິກ2018 ຢູ່ໂຮງແຮມ ຄຣາວພຣາຊາໄດ້ຈັດພິທີຍ້ອງຍໍຜູ້ທີ່ມີຜົນງານໃນການກໍ່ສ້າງ ໂຄງການເຂື່ອນໄຟຟ້າເທີນ-ຫີນບູນ ພາກຂະຫຍາຍ ໂດຍການເຂົ້າຮ່ວມ ຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງ ການເງິນ, ມີ ທ່ານລັດຖະມົນຕີກະຊວງ ພະລັງງານ ແລະ ບໍ່ແຮ່, ທ່ານ ເຈົ້າແຂວງ-ຮອງເຈົ້າແຂວງ, ຫົວໜ້າພະແນກ ພະລັງງານ ແລະ ບໍ່ແຮ່ ແຂວງ ບໍລິຄຳໄຊ ແລະ ແຂວງ ຄຳມ່ວນ, ບັນ ດາທ່ານ ເຈົ້າເມືອງ ແລະ ຮອງເຈົ້າເມືອງ ບ່ອນໂຄງການຕັ້ງຢູ່, ຜູ້ບໍລິຫານຂອງບໍລິສັດເທີນ-ຫີນບູນ ພາວເວີ ຈຳກັດ ແລະ ພະນັກງານ ກ່ຽວຂ້ອງເຂົ້າຮ່ວມຢ່າງພ້ອມພຽງ. ໃນພິທີອັນມີຄວາມໝາຍນີ້ ທ່ານ ທອງຂັນ ພິມວິໄລ ຫົວໜ້າກົມຈັດຕັ້ງ ແລະ ພະນັກງານ, ກະຊວງ ພະລັງງານ ແລະ ບໍ່ແຮ່ ໄດ້ຂຶ້ນຜ່ານບັນດານິຕິກຳທີ່ກ່ຽວຂ້ອງຕ່າງໆເຊັ່ນ: ລັດຖະບັນຢັດຂອງປະທານປະເທດ ວ່າດ້ວຍການມອບຫຼຽນໄຊແຮງງານຊັ້ນ II, III ແລະ ຫຼຽນກາແຮງງານ ໃນນີ້, ຫຼຽນໄຊແຮງງານຊັ້ນ II ມອບໃຫ້ 2 ກົມກອງ, 10 ບຸກຄົນ; ຫຼຽນໄຊແຮງງານຊັ້ນ III ໃຫ້ 3 ກົມກອງ ແລະ 30 ບຸກຄົນ; ຫຼຽນກາແຮງງານ ໃຫ້ 1 ກົມກອງ ແລະ 4 ບຸກຄົນ ໂດຍແມ່ນທ່ານ ຮອງນາຍົກລັດຖະມົນຕີ ເປັນຜູ້ມອບ. ນອກຈາກນີ້, ຍັງໄດ້ມອບໃບຍ້ອງຍໍລັດຖະບານ ໃຫ້ 2 ພາກສ່ວນ, 3 ບຸກຄົນ ແລະ ໃບຍ້ອງຍໍຂອງ ກະຊວງ ພະລັງງານ ແລະ ບໍ່ແຮ່ ໃຫ້ 5 ບຸກຄົນຕື່ມອີກ. ໃຫ້ກຽດມອບໃບຍ້ອງຍໍລັດຖະບານ ແລະ ໃບຍ້ອງຍໍຂອງກະຊວງ ພະລັງງານ ແລະ ບໍ່ແຮ່ ແມ່ນ ທ່ານ ປອ.ຄຳມະນີ ອິນທິລາດ ລັດຖະມົນຕີກະຊວງ ພະລັງງານ ແລະ ບໍ່ແຮ່. ໂຄງການເທີນ-ຫີນບູນ ພາກຂະຫຍາຍ (THXP) ແມ່ນໂຄງການທີ່ສືບເນື່ອງມາຈາກໂຄງການໄຟຟ້າເທີນ-ຫີນບູນ ທີ່ມີຢູ່ແລ້ວ (ເລີ່ມຜະລິດ 1998) ເພື່ອເພີ່ມຂີດຄວາມອາດສາມາດ ໃນການຜະລິດກະແສໄຟຟ້າຂື້ນຕື່ມ ຕອບສະໜອງກັບຄວາມຮຽກຮ້ອງຕ້ອງການພະລັງງານ ທີ່ມີແນວໂນ້ມສູງຂື້ນໃນປັດຈຸບັນ. ໂຄງການ ເທີນ-ຫີນບູນ ເກົ່າປະກອບດ້ວຍເຮືອນຈັກໄຟຟ້າພະລັງນໍ້າແບບຝາຍນໍ້າລົ້ນ ແຫ່ງທຳອິດໃນ ສປປ ລາວ ທີ່ພັດທະນາໂດຍພາກເອກະຊົນ, ສາມາດຜະລິດພະລັງງານໄຟຟ້າ ໂດຍສະເລັ່ຍ 1.450 GWh ຕໍ່ປີ ແລະ ໄດ້ຮັບຜົນການດໍາເນີນງານເປັນທີ່ໜ້າເພິ່ງພໍໃຈ. ໂຄງການ THXP ໄດ້ກໍ່ສ້າງເຂື່ອນດັດສົມນ້ຳຢູ່ສາຍນ້ຳຍວງຈຸດ 8 ຊຶ່ງຕັ້ງຫ່າງຈາກເຂື່ອນເທີນ-ຫີນບູນເກົ່າປະມານ 20 ກມ. ໂຄງສ້າງເຂື່ອນເປັນແບບເບຕົງອັດຢຽບແໜ້ນ (RCC: Roller Compacted Concrete) ຊື່ງມີປະຕູປ່ອຍນ້ຳລົ້ນທາງກາງເຂື່ອນ 5 ປະຕູ. ອ່າງເກັບນໍ້າ ສາມາດບັນຈຸນ້ຳໄດ້ 2.450 ລ້ານ ມ3, ມີລະດັບນ້ຳໃນການຜະລິດກະແສໄຟຟ້າສູງສຸດທີ່ 455 ມ ແລະ ຕ່ຳສຸດທີ່ 420 ມເໜືອໜ້ານໍ້ທະເລ. ໂຄງການ THXP ມີກຳລັງຕິດຕັ້ງທັງໝົດ 500 MW. ໃນນັ້ນປະກອບດ້ວຍ: 220 MW ທີ່ມີຢູ່ແລ້ວ220 MW ຂະຫຍາຍເພີ່ມ (ຕິດເຄື່ອງຈັກໃໝ່) ຢູ່ຕິດກັບໂຮງຈັກປັດຈຸບັນ ແລະ 60 MW ຕິດເຄື່ອງຈັກໃໝ່ ຢູ່ເຂື່ອນນ້ຳຍວງ 8. ຜົນຜະລິດສະເລັ່ຍປະຈຳປີຈະເພີ່ມຂຶ້ນເປັນ 3.003 GWh. ຊຶ່ງຜະລິດຢູ່ເຮືອນຈັກເທີນ- ຫີນບູນ 2.700 GWh ແລະ ຢູ່ເຂື່ອນນ້ຳຍວງ 8 ປະມານ 303 GWh ໂດຍມີ 3 ຂາຮຸ້ນຄື: ບໍລິສັດຜະລິດໄຟຟ້າມະຫາຊົນຖືຮຸ້ນ 60 %; GMS Lao Co., Ltd ຖືຮຸ້ນ 20 % ແລະ ບໍລິສັດ Statkraf Co 20 %.

X