• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ນະຄອນຫຼວງວຽງຈັນຈະມີສາຍສົ່ງ 500/230 kV ເພື່ອຮອງຮັບການຂະຫຍາຍຕົວຂອງຕົວເມືອງໃນອະນາຄົດ

ພິທີວາງສີລາລືກກໍ່ສ້າງໂຄງການສາຍສົ່ງ 500/230 ກິໂລໂວນອ້ອມນະຄອນຫຼວງວຽງຈັນໄດ້ມີຂື້ນໃນຕອນເຊົ້າວັນທີ 19 ເມສາ ທີ່ຜ່ານມາ ທີ່ສະຖານີ ດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ປອ.ຄຳມະນີ ອິນທິລາດ, ລັດຖະມົນຕິກະຊວງ ພະລັງງານ ແລະ ບໍ່ແຮ່, ມີບັນດາທ່ານຮອງລັດຖະມົນຕີ,ປະທານກຳມະທິການເສດຖະກິດເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ, ພ້ອມດ້ວຍແຂກຈາກພາກສ່ວນກ່ຽວຂ້ອງເຂົ້າຮ່ວມ. ທ່ານ ລັດຖະມົນຕີ ໄດ້ຕາງໜ້າໃຫ້ລັດຖະບານ ກໍ່ຄືຄະນະພັກ, ຄະນະນຳກະຊວງ ພະລັງງານ ແລະ ບໍ່ແຮ່ ກ່າວວ່າ: ໃນຊຸມປີຜ່ານມາ, ກະຊວງພະລັງງານ ແລະ ບໍ່ແຮ່ ໃນຖານະເປັນເສນາທິການໃຫ້ລັດຖະບານໄດ້ວາງວິໄສທັດ, ຍຸດທະສາດ ແລະ ແຜນພັດທະນາອຸສາຫະກຳພະລັງງານໄຟຟ້າ ໂດຍສະເພາະ ແມ່ນການຂຸດຄົ້ນທ່າແຮງບົ່ມຊ້ອນແຫຼ່ງນ້ຳທຳມະຊາດເພື່ອຜະລິດ ແລະ ສະໜອງກະແສໄຟຟ້າໃຫ້ພຽງພໍກັບຄວາມຕ້ອງການເພື່ອຊົມໃຊ້ຢູ່ພາຍໃນປະເທດ ແລະ ເພີ້ມການສົ່ງອອກໃຫ້ນັບມື້ນັບຫຼາຍຂື້ນ, ບົນພື້ນຖານຮັບປະກັນການພັດທະນາພະລັງງານໄຟຟ້າ ທີ່ເປັນມິດກັບສິ່ງແວດລ້ອມ, ຜະລິດພະລັງງານສະອາດ, ມີຄວາມຍືນຍົງ ແລະ ສູ້ຊົນເພື່ອເຮັດໃຫ້ ສປປ ລາວ ກາຍເປັນໃຈກາງການເຊື່ອມໂຍງພະລັງງານ ຂອງອາຊຽນເທື່ອລະກ້າວ. ທ່ານ ກ່າວຕື່ມວ່າ: ໂຄງການສາຍສົ່ງ 500/230 ກິໂລໂວນ(ກວ) ອ້ອມນະຄອນຫຼວງວຽງຈັນ ເປັນໂຄງການໜຶ່ງທີ່ນອນຢູ່ໃນແຜນພັດທະນາລະບົບໄຟຟ້າຂອງ ສປປລາວ ເພຶ່ອນຳເອົາພະລັງງານຈາກບັນດາເຂື່ອນຕ່າງໆມາສະໜອງໄຟຟ້າໃຫ້ ນະຄອນຫຼວງ ວຽງຈັນ ປັດຈຸບັນ ແລະ ການຂະຫຍາຍຕົວໃນອານາຄົດຂ້າງໜ້າໃຫ້ພຽງພໍທັງຮັບປະກັນມີຄວາມສະຖຽນລະພາບ, ນອກຈາກນັ້ນ ກໍຍັງເປັນສາຍສົ່ງເຊື່ອມຕໍ່ກັບພາກພື້ນຕື່ມອີກ. ໂຄງການດັ່ງກ່າວໄດ້ຜ່ານ 4 ເມືອງ ຂອງນະຄອນຫຼວງວຽງຈັນຄື: ເມືອງປາກງື່ມ, ເມືອງໄຊທານີ, ເມືອງໄຊເສດຖາ ແລະ ເມືອງຫາດຊາຍຟອງ ນະຄອນຫຼວງວຽງຈັນ, ໜ້າວຽກປະກອບມີພາກສ່ວນສາຍສົ່ງ ແລະ ພາກກໍ່ສ້າງສະຖານີ ຄື : 1) ພາກສ່ວນກໍ່ສ້າງສາຍສົ່ງ: ກໍ່ສ້າງສາຍສົ່ງ 500 ກິໂລໂວນ ວົງຈອນຄູ່ຈາກສະຖານີດ່ານຊີ ຫາ ສະຖານີດົງໂພສີ ລວງຍາວ 53,5 ກິໂລແມັດ ເປັນລະບົບ 4 ຕໍ່ phase ແລະ ມີສາຍສື່ສານ ແລະ ສາຍຫຼໍ່ຟ້າຂະໜາດ 36 Core, ກໍ່ສ້າງສາຍສົ່ງ 230 ກິໂລໂວນ ວົງຈອນຄູ່ຈາກສະຖານີນາບົງ ຫາ ສະຖານີດົງໂພສີລວງຍາວ 39 ກິໂລແມັດ ແລະ 2) ພາກກໍ່ສ້າງສະຖານີ: ຂະຫຍາຍສະຖານີ 500 ກິໂລໂວນດ່ານຊີ 2 ເບ, ຂະຫຍາຍສະຖານີ 500 ກິໂລໂວນ ນາບົງ 2 ເບ ຂະຫຍາຍສະຖານີ 230 ກິໂລໂວນ ນາບົງ 2 ເບ, ຂະຫຍາຍສະຖານີ 230 ກິໂລໂວນ ດົງໂພສີ 2 ເບ ລວມທັງຕິດ ຕັ້ງໝໍ້ແປງກຳລັງ 200/200/60 MVA (230/115/22 KV) ຈໍານວນ 2 ໜ່ວຍ, ກໍ່ສ້າງ 2 ເບ 115 ກິໂລໂວນອອກຈາກໝໍ້ແປງກຳລັງ 2 ເບ ຢູ່ສະຖານີດົງໂພສີ, ພາກ 22 ກິໂລໂວນ, ຕິດຕັ້ງ Shunt Reactor ຈຳນວນ 4 ຊຸດ ຢູ່ສະຖານີດົງໂພສີ, ໂຄງການດ່ັງກ່າວໄດ້ຮັບການສະໜັບສະໜູນເງິນກູ້ດອກເບ້ຍຕ່ຳຈາກລັດຖະບານ ສປ ຈີນ.

X