• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ທ່ານ ລັດຖມົນຕີ ກະຊວງ ພະລັງງານ ແລະ ບໍ່ແຮ່ ລົງພົບປະ, ໂອ້ລົມ ບັນດາກົມ, ສະຖາບັນ ແລະ ລັດວິສາຫະກິດ ອ້ອມຂ້າງກະຊວງ

ເລີມແຕ່ຕົ້ນເດືອນ ມັງກອນ 2019 ເປັນຕົ້ນມາ ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ລົງເຄື່ອນໄຫວພົບປະ, ຢ້ຽມຢາມ ແລະ ໂອ້ລົມພະນັກງານ-ລັດຖະກອນຢູ່ຫ້ອງການ, ບັນດາກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງ ໃນນີ້ລວມມີ: ກົມນະໂຍບາຍ ແລະ ແຜນພະລັງງານ, ກົມທຸລະກິດພະລັງງານ, ກົມຄຸ້ມຄອງພະລັງງານ, ກົມແຜນການ ແລະ ການຮ່ວມມື, ກົມທໍລະນີສາດ ແລະ ແຮ່ທາດ, ກົມຄຸ້ມຄອງບໍ່ແຮ່, ສະຖາບັນສົ່ງເສີມພະລັງງານທົດແທນ, ສະຖາບັນຄົ້ນຄວ້າພະລັງງານ ແລະ ບໍ່ແຮ່ ແລະ ບັນດາລັດວິສາຫະກິດຂຶ້ນກັບ. ການລົງເຄື່ອນໄຫວ ຢູ່ແຕ່ລະບ່ອນນັ້ນ, ກ່ອນອື່ນ ທ່ານ ກໍ່ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຂອງບັນດາກົມ ແລະ ສະຖາບັນ ຕະຫຼອດໄລຍະຜ່ານມາ, ທິດທາງແຜນການໃນຕໍ່ໜ້າ ພ້ອມທັງຂໍ້ສະເໜີ ແລະ ການແລກປ່ຽນຄວາມຄິດເຫັນຂອງພະນັກງານ-ລັດຖະກອນ ໃນບັນຫາທີ່ຕິດພັນກັບວຽກງານຂອງຂະແໜງການຈາກ ຄະນະພັກ, ຄະນະນຳ ແລະ ພະນັກງານຫຼັກແຫຼ່ງ, ຂອງບັນດາກົມ, ສະຖາບັນ ແລະ ລັດວິສາຫະກິດ. ພາຍຫຼັງຮັບຟັງການລາຍງານ ແລະ ສະເໜີແລ້ວ ທ່ານ ລັດຖະມົນຕີກໍ່ໄດ້ໃຫ້ກຽດໂອ້ລົມ ເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງອ້າຍ-ນ້ອງພະນັກງານ, ສຳມະຊິກພັກ ທຸກສະຫາຍ ເຊິ່ງຍາມໃດ ກໍ່ມີຄວາມບຸກບືນ, ອົດທົນ, ສູຊົນ ຜ່ານຜ່າທຸກອຸປະສັກຫຍຸ້ງຍາກ ໃນການຈັດຕັ້ງປະຕິບັດວິໄສທັດ ຮອດປີ 2030, ຍຸດທະສາດ 2025 ແລະ ແຜນພັດທະນາພະລັງງານ ແລະ ບໍ່ແຮ່ 5 ປີ 2016-2020 ຢ່າງມີຜົນສຳເລັດ ຊຶ່ງສະແດງໃນການເຕີບໂຕ ແລະ ການຂະຫຍາຍຕົວຂອງບັນດາໂຄງການໄຟຟ້າ, ໂດຍສະເພາະການຊົມໃຊ້ໄຟຟ້າ ແລະ ລວມເຖິງຍອດຜະລິດຕະພັນຂອງຂະແໜງການ. ອີງຕາມການລາຍງານຂອງ ກະຊວງ ແຜນການ ແລະ ການລົງທຶນ ໃນປີ 2018 ຂະແໜງພະລັງງານ ແລະ ບໍ່ແຮ່ ມີມູນຄ່າການສົ່ງອອກທັງໝົດ 1 ຕື້ກວ່າໂດລາສະຫະລັດ, ກວມເອົາ 17% ຂອງ ລວມຍອດຜະລິດຕະພັນພາຍໃນຫຼື GDP, ໃນນີ້ ຂະແໜງພະລັງງານ ໄດ້ຂະຫຍາຍຕົວເກືອບ 300 ເທົ່າ ເມື່ອທຽບກັບໄລຍະປົດປ່ອຍໃໝ່. ເນື່ອງຈາກໃນຊຸມປີ 70 ທົ່ວປະເທດມີແຫຼ່ງຜະລິດພະລັງງານໄຟຟ້າ ທັງນ້ອຍ ແລະ ໃຫຍ່ ບໍ່ຮອດ 5 ໂຄງການ, ມີກຳລັງຕິດຕັ້ງບໍ່ຮອດ 100 ເມັກກາວັດ, ແຕ່ປະຈຸບັນມີເຖິງ 61ແຫ່ງ, ລວມກຳລັງຕິດຕັ້ງ 7.200 ເມັກກາວັດ, ບັນດາແຂວງ, ເມືອງໃນຂອບເຂດທົ່ວປະເທດ ໄດ້ຊົມໃຊ້ໄຟຟ້າຖາວອນແລ້ວ 100%, ບັນດາບ້ານ 90% ກວ່າສ່ວນຮ້ອຍ ແລະ ກວມເອົາ 94% ຂອງຈຳນວນຄອບຄົວໃນທົ່ວປະເທດ ເຊິ່ງມີແຕກຕ່າງຢ່າງສິ້ນເຊີງກັບໄລຍະປົດປ່ອຍໃໝ່ ທີ່ມີສະເພາະແຕ່ເມືອງໃຫ່ຍ ທີ່ມີໄຟຟ້າຊົມໃຊ້ ແລະ ກໍ່ເປັນພຽງໄຟຟ້າທີ່ໃຊ້ຈັກນໍ້າມັນເຊິ່ງບໍ່ ສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງພໍ່ແມ່ປະຊາຊົນ. ຄຽງຄູ່ກັບຜົນສຳເລັດນັ້ນ ທ່ານຍັງໄດ້ຊີ້ນຳ ແລະ ຮຽກຮ້ອງໃຫ້ ຄະນະພັກ, ຄະນະນຳ ແລະ ພະລັງງານ-ລັດຖະກອນທຸກສະຫາຍຈົງເຊີດຊູ່ຄວາມຮັບຜິດຊອບທາງດ້ານການເມືອງຂອງຕົນ ໃຫ້ສູງຂຶ້ນກວ່າເກົ່າ, ປັບປຸງແບບແຜນວິທີການເຮັດວຽກໃຫ້ສອດຄ່ອງກັບການພັດທະນາຂອງໂລກ ກໍຄືຂອງປະເທດໃນແຕ່ລະໄລຍະ, ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖອນ ມີຄວາມອຸ່ນອຽນທຸນທ່ຽງ, ມີນ້ຳໃຈເສຍສະຫຼະ, ອົດທົນ, ບຸກບື່ນ, ບໍ່ສະແຫວງຫາຜົນປະໂຫຍສ່ວນຕົວ, ຕີຖ່ອຍແນວຄິດການສ້າງພັກ, ແບ່ງພວກ,ການສ້າງເປັນກຸ່ມ ເປັນກ້ອນ, ຈຳແນກມິດ-ສັດຕູ ເພື່ອເຮັດແນວໃດ ເຮັດໃຫ້ຂະແໜງພະລັງງານ ແລະ ບໍ່ແຮ່ ກາຍເປັນຂະແໜງການທີ່ນຳໜ້າເປັນແບບຢ່າງໃນການສ້າງເສດຖະກິດແບບທັນສະໄໝຢູ່ປະເທດເຮົາ, ນຳເອົາຜົນປະໂຫຍດສູງສຸດມາສູ່ປະເທດຊາດ ແລະ ປະຊາຊົນລາວ ໃຫ້ຢູ່ດີ, ກິນດີ, ນຳພາປະເທດຊາດຫຼຸດພົ້ນອອກຈາປະເທດດ້ອຍພັດທະນາໃຫ້ໄດ້ຕາມແນວທາງນະໂຍບາຍຂອງພັກ ແລະ ລັດຖະບານວາງອອກ.

X