• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ການນຳກະຊວງ ພະລັງງານ ແລະ ບໍ່ແຮ່ ຕ້ອນຮັບເອກອັກຄະລັດຖະທູດ ສາທາລະນະລັດ ຝຣັ່ງ

ຕອນບ່າຍວັນທີ 7 ມັງກອນ 2019 ນີ້ ຢ່ຫ້ອງຮັບແຂກກະຊວງ ພະລັງງານ ແລະ ບໍ່ແຮ່, ທ່ານ ປອ. ຄຳມະນີ ອິນທິລາດ ລັດຖະມົນຕີກະຊວງ ພະລັງງານ ແລະ ບໍ່ແຮ່ ພ້ອມຄະນະໄດ້ໃຫ້ກຽດຕ້ອນຮັບ ທ່ານ ເອກອັກຄະລັດຖະທູດ ແຫ່ງ ສາທາລະນະ ຟຣັ່ງປະຈຳ ສປປລາວ ນຳໂດຍ ທ່ານ ນາງ Florence Teanblanc Risler ເອກອັກຄະລັດຖະທູດ ຜູ້ມີອຳນາດເຕັມແຫ່ງ ສາທາລະນະລັດ ຝຣັ່ງປະຈຳ ສປປລາວ ເຂົ້າຢ້ຽມຂ່ຳນັບ, ພົບປະ, ປຶກສາຫາລື. ໃນໂອກາດນີ້, ທ່ານ ລັດຖະມົນຕີໄດ້ສະແດງຄວາມຕ້ອນຮັບ ທ່ານ ເອກອັກຄະລັດຖະທູດ ພ້ອມຄະນະຢ່າງອົບອຸ່ນ ພ້ອມທັງສະແດງຄວາມຂອບໃຈທີ ລັດຖະບານ ແລະ ປະຊາຊົນ ຝຣັ່ງທີ່ໃຫ້ການສະໜັບສະໜູນ ລັດຖະບານກໍ່ຄືປະຊາຊົນລາວ ເວົ້າລວມ, ເວົ້າສະເພາະຕໍ່ການຊ່ວຍເຫຼືອໃນຂະແໜງພະລັງງານ ແລະ ບໍ່ແຮ່ ເຊິ່ງ ຝຣັ່ງກໍ່ເປັນປະເທດໜຶ່ງ ທີ່ໃຫ້ການສະໜັບສະໜູນ ນະໂຍບາຍການພັດທະນາພະລັງງານໄຟຟ້ານ້ຳຕົກ ຢູ່ ສປປລາວ ໃນນີ້ ອັນພົນເດັ່ນກວ່າໝູ່ ແມ່ນການສະໜັບສະໜູນທາງດ້ານການເງິນ ແລະ ຂົນຂວາຍຜູ້ໃຫ້ທຶນ ໃນການພັດທະນາ, ກໍ່ສ້າງ ແລະ ດຳເນີນງານໂຄງການເຂື່ອນໄຟຟ້ານ້ຳຕົກນ້ຳເທີນ 2 ເຊິ່ງເປັນໂຄງການໄຟຟ້ານ້ຳຕົກຂະໜາດໃຫຍ່ທີ່ສຸດຢູ່ ສປປ ລາວ ໃນຂະນະນີ້, ມີກຳລັງຕິດຕັ້ງເຖິງ 1.000 ກວ່າເມັກກາວັດ ສາມາດສ້າງລາຍຮັບເປັນເງິນຕາຕ່າງປະເທດເຂົ້າປະເທດຢ່າງມະຫາສານ ພ້ອມທັງສະໜອງຄວາມຕ້ອງການດ້ານການຊົມໃຊ້ພະລັງງານໄຟຟ້າຢູ່ບັນດາແຂວງພາກກາງຕື່ມອີກ. ນອກຈາກນີ້, ລັດຖະບານ ຟຣັ່ງ ກໍ່ຍັງເປັນປະເທດທຳອິດທ່ີໃຫ້ການສະໜັບສະໜູນກໍ່ສ້າງໂຄງການເຂື່ອນໄຟຟ້າຢູ່ ສປປ ລາວ ເປັນຕົ້ນແມ່ນໂຄງການ ນ້ຳດົງ ຢູ່ແຂວງ ຫຼວງພະບາງ ແລະ ໂຄງການເຊລະບຳ ຢູ່ແຂວງ ຈຳປາສັກ ທັງສອງໂຄງການໄດ້ກໍ່ສ້າງ ສຳເລັດ ແລະ ເປີດຜະລິດໄຟຢ່າງເປັນທາງການໃນປີ 1970. ຕອນທ້າຍ ທ່ານ ລັດຖະມົນຕີ ກໍ່ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງສູງ ຕໍ່ການຊ່ວຍເຫຼືອອັນລ້ຳຄ່າຂອງລັດຖະບານ ແລະ ປະຊາຊົນຝຣັ່ງ ໃນການຊ່ວຍເຫຼືອປະສານງານ ແລະ ຈັດສົ່ງຄະນະຊ່ຽວຊານລະດັບສາກົນເຂົ້າມາຊ່ວຍກວດກາຫາສາຍເຫດທີ່ພາໃຫ້ເກີດໂຊກຕະກຳເຂື່ອນກັ້ນນ້ຳ ເຊປ່ຽນ-ເຊນໍ້ນ້ອຍ ແຕກໃນກາງປີ 2018 ທີ່ຜ່ານມາ, ໄດ້ສ້າງຄວາມເສຍຫາຍຢ່າງຫຼວງຫຼາຍຕໍ່ຊີວິດຊັບສິນຂອງພໍ່ແມ່ປະຊາຊົນຜູ້ດຳລົງຊີວິດຢູ່ໃຕ້ເຂື່ອນ ເຂດເມືອງ ສະໜາມໄຊ ແຂວງ ອັດຕະປື.
ພ້ອມນີ້, ທ່ານ ຍັງໄດ້ເຊື້ອເຊີນ ແລະສະເໜີ ທ່ານ ທູດ ໃຫ້ການຂົນຂວາຍນັກທຸລະກິດຝຣັ່ງ ເຂົ້າມາລົງທຶນ ຢູ່ສປປລາວ ຕື່ມອີກ ໂດຍສະເພາະແມ່ນການລົງທຶນດ້ານພະລັງງານ ແລະ ບໍ່ແຮ່. ສ່ວນ ທ່ານ ທູດ ກໍ່ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ທີ່ໃຫ້ການຕ້ອນຮັບ ແລະ ຮ່ວມສົນທະນາໃນຫຼາຍບັນຫາ ທີ່ ທ່ານທູດໃຫ້ຄວາມສົນໃຈໂດຍສະເພາະແມ່ນ ນະໂຍບາຍຂອງລັດຖະບານລາວ ໃນການພັດທະນາຂະແໜງ ພະລັງງານ ແລະ ບໍ່ແຮ່ ຕິດພັນກັບການພັດທະນາແບບສີຂຽວ ແລະ ຍືນຍົງ, ກົນໄກ ແລະ ວິທີການຄຸ້ມຄອງແຮ່ພິເສດຢູ່ ສປປ ລາວ ພ້ອມທັງຍິນດີຈະລະດົມຂົນຂວາຍນັກທຸລະກິດຈາກ ຟຣັ່ງ ເຂົ້າມາລົງທຶນຢູ່ ສປປລາວ ໃຫ້ຫຼາຍຂຶ້ນກວ່າເກົ່າ, ໂດຍສະເພາະແມ່ນການລົງທຶນດ້ານພະລັງງານໄຟຟ້ານ້ຳຕົກ, ການເຊື່ອມຕໍ່ລະບົບ ລະຫວ່າງ ໄຟຟ້ານ້ຳຕົກ ກັບພະລັງງານທີ່ໄດ້ຈາກ ໂຄງການໄຟຟ້າແສງອາທິດ, ລົມ, ການຄຸ້ມຄອງ, ຟື້ນຟູ ໂຄງການຂຸດຄົ້ນບໍ່ແຮ່ຢູ່ ສປປ ລາວ ໃຫ້ມີປະສິດທິພາບປະສິດທິຜົນດີ.

X