• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ກະຊວງ ພະລັງງານ ແລະ ບໍ່ແຮ່ ຈັດພິທີບາສີສູ່ຂວັນ ແລະ ຕັກບາດ ເນື່ອງໃນໂອກາດສະເຫຼີມສະຫຼອງວັນກຸດສົ່ງການ ສົ່ງທ້າຍປີເກົ່າ ພສ 2560 ຕ້ອນຮັບປີໃໝ່ ພສ 2561

ບຸນກຸດສົ່ງການ ຫຼື ບຸນປີໃໝ່ລາວ ແມ່ນເປັນເທດສະການໜຶ່ງຂອງປະຊາຊົນຊາວລາວທັງພາຍໃນ ແລະ ຢູ່ຕ່າງປະເທດ ໄດ້ພ້ອມພາກັນຈັດຂຶ້ນທຸກໆປີ ໃນຂອບເຂດທົ່ວປະເທດ. ນອກຈາກເປັນປາງບຸນໃຫຍ່ ທີ່ໃຜໆກໍ່ຕື່ນຕົວສະໝັກໃຈເຂົ້າຮ່ວມໃນການສົ່ງພອນ ຫົດນໍ້າເຊິ່ງກັນ ແລະ ກັນແລ້ວ ຍັງເປັນກາລະໂອກາດອັນດີທີ່ເປັນສີລິມຸ່ງຄຸນ ເພື່ອເປັນການຄະມ່າ-ຂໍໂທດຂອງລູກຂອງຫຼານ ຕໍ່ພໍ່-ແມ່, ປູ່-ຍ່າ, ຜູ້ເຖົ້າ-ຜູ້ແກ່, ອ້າຍ-ເອື້ອຍ ຫຼື ເວົ້າຢ່າງໜຶ່ງ ກໍ່ເປັນການຂໍໂທດຂອງຜູ້ນ້ອຍ ຕໍ່ຜູ້ຫຼັກ ຜູ້ໃຫຍ່ ຫຼື ຜູ້ມີພະຄຸນ ທີ່ສືບທອດປະຕິບັດກັນມາ ແຕ່ລຸ້ນບັນພະບຸລຸດ ແລະ ກໍ່ມີຄັ້ງດຽວເທົ່ານັ້ນ ທີ່ຈັດຂຶ້ນໃນປີໜຶ່ງ. ສຳລັບປີ ຄສ 2018 ຫຼື ພສ 2561 ນີ້ ພໍດີກົງກັບວັນທີ 14,15 ແລະ 16 ຂອງເດືອນ ເມສາ 2018.

ນອກຈາກເປັນກາລະໂອກາດ ໃຫ້ແກ່ການສົມມ່າຄະຣາວະຕໍ່ບິດາ-ມານດາ, ອ້າຍ-ເອື້ອຍ, ຜູ້ເຖົ້າ-ຜູ້ແກ່ ຢູ່ໃນບ້ານ ໃນເຮືອນແລ້ວ ຢູ່ຕາມສຳນັກງານອົງການຂອງ ພັກ ຂອງ ລັດ ທັງຢູ່ ສູນກາງ ແລະ ທ້ອງຖິ່ນ ໃນຂອບເຂດທົ່ວປະເທດ ໂດຍສະເພາະແມ່ນ ບ່ອນທີ່ມີເງື່ອນໄຂ ຕາງກໍ່ຈັດພິທີບາສີສູ່ຂວັນ ແລະ ອວຍພອນເຊິ່ງກັນ ແລະ ກັນ ຢ່າງເບີກບານມ່ວນຊື່ນ.

ຢູ່ກະຊວງ ພະລັງງານ ແລະ ບໍ່ແຮ່ ກໍ່ເປັນສະຖານທີ່ໜຶ່ງ ທີ່ໄດ້ຈັດພິທີຕັກບາດຖະວາຍ ສັງຂະທານ, ອວຍພອນ ເຊິ່ງກັນ ແລະ ກັນ ລະຫວ່າງ ການນຳກະຊວງ ກັບ ການນຳກະຊວງ; ລະຫວ່າງ ການນຳກະຊວງ ກັບ ພະນັກງານ-ລັດຖະກອນ ແລະ ລະຫວ່າງ ພະນັກງານ-ລັດຖະກອນ ດ້ວຍກັນ. ນອກຈາກນີ້, ຍັງມີພະນັກງານອາວຸໂສ-ບຳນານ ແລະ ພະນັກງານຊ່ວຍວຽກເຂົ້າຮ່ວມຢ່າງພ້ອມພຽງ.

ໃນໂອກາດທີ່ເປັນສິລິມຸ່ງຄຸນ ແລະ ເລີກງາມຍາມດີນີ້ ທ່ານ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ໄດ້ຕາງໜ້າໃຫ້ ຄະນະພັກ, ຄະນະນຳກະຊວງ ແລະ ພະນັກງານ-ລັດຖະກອນ ທົ່ວກະຊວງ ພະລັງງານ ແລະ ບໍ່ແຮ່ ກ່າວອວຍພອນຕໍ່ການນຳພັກ-ລັດ ຈົ່ງມີສຸຂະພາບເຂັ້ມແຂງ, ມີອາຍຸໝັ້ນຂວັນຍືນ, ສືບຕໍ່ນໍາພາປ່ວງຊົນລາວທັງຊາດ ສ້າງສາພັດທະນາປະເທດຊາດໃຫ້ຮັ່ງມີສີວິໄລ,  ປະຊາຊົນຢູ່ດີກິນດີ, ສັງຄົມມີຄວາມສະຫງົບສຸກ. ພ້ອມກັນນີ້, ທ່ານ ຍັງໄດ້ອວຍພອນ ໃຫ້ທະຫານ, ຕຳຫຼວດ, ພໍ່ຄ້າ, ຊາວຂາຍ, ນັກຮຽນຮູ້ປັນຍາຊົນ ຕະຫຼອດຮອດພະນັກງານ-ລັດຖະກອນ ແລະ ປະຊາຊົນລາວທຸກທົ່ວໜ້າ ຈົ່ງມີແຕ່ຄວາມສຸກ, ຄວາມຈະເລີນ ແລະ ຍິ່ງໃຫຍ່ກວ່າເກົ່າ.

X