• 021 413000

Search
Exact matches only
Search in title
Search in content
Search in excerpt
Search in comments
Filter by Custom Post Type

ກະຊວງພະລັງງານ ແລະ ບໍ່ແຮ່

Ministry of Energy and Mines

ກອງປະຊຸມເຜີຍແຜ່ ວຽກງານຊາຍແດນ ລາວ-ກຳປູເຈຍ

ຕອນບ່າຍວັນທີ 14 ມິຖຸນາ 2018 ນີ້ ທ່ານ ແພງພັນ ແກ້ວປະເສີດ ຫົວໜ້າຫ້ອງການຄະນະກຳມະທິການ ຊາຍແດນແຫ່ງຊາດ, ກະຊວງ ການຕ່າງປະເທດໄດ້ຕ່າງໜ້າໃຫ້ຄະນະນຳກະຊວງ ການຕ່າງປະເທດ ໃຫ້ກຽດຂຶ້ນເຜີຍແຜ່ສະພາບການພົວພັນຮ່ວມ ມືລະຫວ່າງ ສປປລາວ ກັບ ຣາຊະອານາຈັກ ກຳປູເຈຍ ໂດຍສະເພາະ ແມ່ນສະພາບການຮ່ວມມມືຕາມຊາຍແດນຂອງສອງປະເທດ, ໂດຍໃຫ້ກຽດເຂົ້າຮ່ວມຂອງ ທ່ານ ທອງພັດ ອິນທະວົງ ຮອງເລຂາຄະນະພັກ, ຮອງລັດຖະມົນຕີ; ທ່ານ ນາງຈັນສະຫວາດ ບຸບຜາ ຄະນະປະຈຳພັກ, ຮອງລັດຖະມົນຕີ ພ້ອມດ້ວຍຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງເຂົ້າຮ່ວມ.ໃນໂອກາດດັ່ງກ່າວ ທ່ານ ຫົວໜ້າຫ້ອງການຄະນະກຳມະທິການຊາຍແດນແຫ່ງຊາດໄດ້ ເລົ່າຄືນຄວາມເປັນມາຂອງການພົວພັນຮ່ວມມື ລະຫວ່າງສປປລາວ ກັ ບ ຣາຊະອາຈັ ກ ກຳປູ ເຈຍ ພ້ອມທັງຍົກໃຫ້ເຫັນ ເຖິງຈຸດພິເສດຂອງປະເທດເຮົາ ທີ່ມີຊາຍແດນຕິດຈອດກັບ 5 ປະເທດ, ມີຄວາມຍາວທັງໝົດ 5.452,239 ກິໂລແມັດ ໃນນີ້ ທິດຕາເວັນອອກຕິດກັບສສ ຫວຽດນາມ ມີຄວາມຍາວ 2.337,45ກມ, ທິດຕາເວັນຕົກສ່ຽງໃຕ້ຕິດກັບຣາຊະອານາຈັກໄທຍາວ 1.835 ກມ, ທິດຕາເວັນຕົກສ່ຽງເໜືອຕິດກັບ ສາທາລະນະລັດ ສະຫະພາບມຽນມ້າ ຍາວ 236 ກມ, ທິດເໜືອຕິດກັບສປ ຈີນ ຍາວ 508,78 ກມ ແລະ ທິດໃຕ້ຕິດກັບ ຣາຊະອານຈັກກຳປູເຈຍ ຍາວ 535 ກມ.ທ່ານ ກ່າວຕື່ມວ່າ: ສປປລາວ ແລະຣາຊະອານາຈັກ ກຳປູເຈຍ ລ້ວນແຕ່ຕັ້ງຢູ່ແຫຼມອິນດູຈີນ, ເປັນປະເທດບ້ານໃກ້ເຮືອນຄຽງ, ບ້ານພີເມືອງນ້ອງ, ບ້ານແກ່ວເຮືອນດອງນຳກັນ, ພ້ອມກັນຮ່ວມຊົມໃຊ້ແມ່ນໍ້າລໍເຊ, ພູຜາປ່າດົງ, ດິນດອນຕອນຫຍ້າ ເພື່ອດຳລົງຊີວິດ ແລະດຳເນີນການຕໍ່ສູ້ຕ້ານສັດຕູຜູ້ຮຸກຮານ, ເຄີຍມີມູນເຊື້ອຄວາມສາມັກຄີ, ມິດຕະພາບອັນດີງາມມາແຕ່ດົນນານ. ສປປລາວໄດ້ສືບຕ່ໍ ໃຫ້ ການສະໜັບສະໜູນຢ່າງ ສະເໝີຕົ້ນ ສະເໝີປາຍ ຕໍ່ການປ່ຽນແປງຢູ່ພາຍໃນປະເທດ ຂອງ ກຳປູເຈຍ. ສປປລາວ ມີເສັ້ນຊາຍແດນຕິດກັບຣາຊະອານາຈັກ ກຳປູເຈຍ ຢູ່ແຂວງຈຳປາສັກ ແລະ ແຂວງ ອັດຕະປື, ສ່ວນກຳປູເຈຍມີ ເພຣຍວິເຮຍ, ຊຽງແຕນແລະ ແຂວງ ລັດຕະນະຄີຣີ. ໃນປີ 1995ລັດຖະບານ ຂອງທັງສອງປະເທດໄດ້ຕົກລົງໃຫ້ໃີການສຳຫຼວດ ແລະ ປັກຫຼັກໝາຍຊາຍແດນຮ່ວມກັນ ໂດຍອີງໃສ່ 4 ຫຼັກການພື້ນຖານຄື: 1) ຮັບຮູ້ເຂດແດນຕິດຕໍ່ກັນ, ເຂດແດນທີ່ມີມາແຕ່ຕົກເປັນຫົວເມືອງຂຶ້ນ ໂດຍອີງຕາມແຜນທີ 1/100.000 ແລະ ແຜນທີ່ອື່ນໆ ທີ່ກ່ຽວຂ້ອງ ເຊິ່ງພິມອອກໃນປີ 1933-1953 ໂດຍພະແນກແຜນທີ່ ອິນດູຈີນ;2) ຫຼັກການຕ່າງໆທີ່ສາກົນຮັບຮູ້ກ່ຽວກັບການ ຂີດເສັ້ນຊາຍແດນ; 3) ຄຳນຶງເຖິງເຂດທີ່ປະຊາຊົນຄຸ້ມຄອງຕົວຈິງທີ່ສືບທອດກັນ ມາຫຼາຍເຊັ່ນຄົນແລ້ວ ແລະ 4) ພື້ນຖານຄວາມສະເໝີພາບ, ທ່ຽງທຳ,ສົມເຫດສົມພົນ, ຜ່ອນສັ້ນ, ຜ່ອນຍາວ,ເຄົາລົບສິດ ແລະ ຜົນປະໂຫຍດຂອງກັນ ແລະ ກັນເອກະພາບຢ່າງສົມບູນ. ປີ 2000 ທັງສອງຝ່າຍເລີ້ມສຳຫຼວດ ແລະ ປັກຫຼັກໝາຍຊາຍ ແດນຮ່ວມກັນ, ມາຮອດປີ 2017 ສຳເລັດການສຳຫຼວດທິດເນັ່ງເສັ້ນຊາຍແດນຢູ່ພື້ນທີ່ຕົວຈິງສຳເລັດ465 ກມ ຫຼືເທົ່າກັບ 87% ຂອງເສັ້ນຊາຍແດນທັງໝົດ, ສາມາດປັກຫຼັກໝາຍຊາຍຮ່ວມກັນ 121 ຫຼັກ ໝາຍ,ຍັງເຫຼືອພຽງ 13% ທີ່ບໍ່ທັນໄດ້ ສຳຫຼວດແລະ ປັກຫຼັກໝາຍ ເຊິ່ງເລີມແຕ່ ຫຼັກໝາຍຊາຍແດນ 078 ລຽບຕາມນໍ້າ ເຊກອງຂຶ້ນໄປຫາແກ້ງຕໍມໍ-ຫ້ວຍຕາເງົາ ມີຄວາມຍາວປະມານ 24 ກມ ແລະ ຈາກແກ້ງຕໍມໍ ຫາແກ້ງກະໂຕມ ຍາວ 16 ກມ.ຄວາມຫຍຸ້ງ ທີ່ບໍ່ສາມາດປັກຫຼັກ ໝາຍໃນເຂດບໍລິເວນດັ່ງກ່າວໄດ້ ກໍ່ຍ້ອນວ່າທັງສອງ ຝ່າຍຍັງທັດສະນະ ທີແຕກຕ່າງກັນ. ຝ່າຍລາວເຮົາໄດ້ອີງໃສ່ 4 ຫຼັກການແລະ ແຜນທີ່ຕ່າງໆ ທີ່ທັງສອງຝ່າຍໄດ້ຕົກລົງກັນ, ແຕ່ ກຳປູເຈຍ ພັດຖືເອົາແຜນທີ1/100.000 ທີ່ພິມອອກໃນປີ 1955ເຊິ່ງຄັດກັບຫຼັກການທີ່ໜຶ່ງ ທີ່ຕົກລົງໃຫ້ ອີງໃສ່ແຜນທີ່ ພິມອອກ  ໃນປີ 1933-1953 ແລະ ຕ້ອງແມ່ນແຜນທີ່ຂອງອິນດູຈີນເທົ່ານັ້ນ. ເຂດຫຍຸ້ງຍາກດັ່ງກ່າວກວມເອົາເນື້ອທີ່ທັງໝົດ 550 ຕາລາງກິໂລແມັດ. ເມື່ອມີຄວາມຫຍຸ້ງຍາກຄືແນວນັ້ນ, ນາຍົກລັດຖະມົນຕີ ທັງສອງປະເທດ ເຫັນດີເປັນເອກະພາບກັນວ່າ:
ບໍລິເວນນີ້ ເປັນຈຸດຄົງຄ້າງມິດຕະພາບແລະ ຫ້າມບໍ່ໃຫ້ມີດຳເນີນກິດຈະການໃດໆໃຫ້ຮັກສາສະພາບເດີມຢູ່ບໍລິເວນນີ້ ຈົນກວ່າ ຈະມີການສຳຫຼວດ ແລະ ປັກຫຼັກໝາຍຊາຍແດນສຳເລັດ.ຢ່າງໃດກໍ່ຕາມ, ໃນເດືອນ ກຸມພາ2017 ຝ່າຍລາວເຮົາໄດ້ກວດເຫັນການກໍ່ສ້າງເສັ້ນທາງຂອງຝ່າຍ ກຳປູເຈຍ ຢູ່ບໍລິເວນດັ່ງກ່າວ ແລະ ຝ່າຍລາວກ່ໍໄດ້ສົ່ງຈົດໝາຍທັກທ້ວງ, ພ້ອມນີ້ທັງສອງຝ່າຍ ໄດ້ປະຊຸມປຶກສາຫາລືກັນນັບແຕ່ຂັ້ນທ້ອງຖິ່ນ ຈົນຮອດຂັ້ນສູນກາງ. ຝ່າຍລາວສະເໜີ ໃຫ້ ກຳປູເຈຍ ຢຸດຕິພຶດຕິກຳດັ່ງກ່າວ ພ້ອມທັງຖອນກຳລັງອອກຈາກບໍລິເວນນັ້ນ ເພື່ອຮັກສາສະພາບເດີມໄວ້ ຈົນກວ່າຈະສຳເລັດການສຳຫຼວດ ແລະ ປັກຫັຼກໝາຍຊາຍແດນ. ຕໍ່ບັນຫາດັ່ງດ່າວ ສປປລາວ ໄດ້ພະຍາຍາມຊອກຫາທຸກວິທີທາງແກ້ໄຂໂດຍສັນຕິວິທີ ຕາມແນວທາງຂອງພັກ, ຫຼີກລ້ຽງການປະທະດ້ວຍອາວຸດ, ບໍ່ໃຊ້ຄວາມແຂງກະດ້າງ, ບໍ່ໃຊ້ຄວາມຮຸ້ນແຮງ ແລະ ບໍ່ໃຊ້ກລັງອາວຸດ, ແຕ່ໃຫ້ແກ້ໄຂໂດຍວິ ທີທາງການທູດ.

X